Tulsidas Wealth Hub Knowledge Hubकडे परत

भावातील चढउतार

सेटिंगमधला कालावधी म्हणजे चार्टवरील बारची संख्या. दिलेल्या सेटिंग्ज आणि पातळ्या सुरुवातीची उदाहरणं आहेत. भाव, टाइमफ्रेम आणि बाजाराची स्थिती सोबत पाहा.

ATR (Average True Range)

समजा, तुम्ही रोज कामावर जायला लागणारा वेळ लिहून ठेवता. कधी २० मिनिटं, कधी ३०, तर कधी ४० मिनिटं लागतात. या तीन दिवसांची सरासरी ३० मिनिटं झाली. शेअरच्या चार्टवर ATR असाच भाव साधारण किती रुपयांनी हलतो ते सांगतो.

हिशोब कसा होतो? समजा, शेअरचा कालचा बंद भाव ₹१०० होता. आज तो ₹१०६ ला उघडला आणि दिवसभर ₹१०५ ते ₹११० मध्ये फिरला. आजच्या सत्रात वरचा आणि खालचा भाव यात ₹५ चं अंतर आहे. पण कालच्या ₹१०० पासून आजच्या ₹११० पर्यंत ₹१० चं अंतर आहे. ATR च्या हिशोबात हे मोठं अंतर घेतात, त्यामुळे दोन सत्रांमधली उडीही मोजली जाते. अशा हालचालींची सरासरी म्हणजे ATR.

चार्टवर कसा वाचायचा? Daily चार्टवर ATR ₹२ वरून ₹४ झाला, तर भावाची रोजची हालचाल आधीपेक्षा वाढली आहे. भाव किती हलतो ते ATR सांगतो. तो वर जाईल की खाली, ते सांगत नाही.

चार्टवर कसा लावायचा? ƒx / Indicators मध्ये ATR शोधून निवडा. सेटिंगमध्ये Length 14 हे एक प्रचलित उदाहरण आहे. चार्ट हिशोब आपोआप करतो आणि खाली ATR ची रेषा दाखवतो.

इंडिकेटर लावल्यानंतर चार्ट कसा दिसतो ते पाहा.

Bollinger Bands

समजा, तुमच्या दुकानात रोज साधारण ₹१,००० ची विक्री होते. काही दिवस ती ₹९५० ते ₹१,०५० च्या आसपास असते. सणाच्या दिवसांत मात्र कधी ₹८००, तर कधी ₹१,३०० ची विक्री होते. सरासरीच्या आसपासची विक्री आता जास्त कमी-जास्त होतेय. शेअरच्या चार्टवर Bollinger Bands असाच भावातला चढ-उतार दाखवतात.

हिशोब कसा होतो? चार्ट आधी गेल्या २० कॅण्डल्सच्या बंद भावांची सरासरी काढतो. ती मधली रेषा. मग भाव त्या सरासरीपासून साधारण किती दूर गेले आहेत, त्यावरून वरची आणि खालची रेषा काढतो. भावात जास्त चढ-उतार झाले तर या रेषा दूर जातात. चढ-उतार कमी झाले तर त्या जवळ येतात.

चार्टवर कसं वाचायचं? समजा मधली रेषा ₹१००, वरची ₹१०६ आणि खालची ₹९४ आहे. भाव ₹१०६ जवळ असेल तर तो वरच्या रेषेजवळ आहे. वरच्या रेषेला भाव लागला म्हणून तो लगेच खाली येईल असं नाही. जोरदार तेजीमध्ये भाव काही काळ वरच्या रेषेजवळच राहू शकतो.

चार्टवर कसं लावायचं? ƒx / Indicators मध्ये Bollinger Bands शोधून निवडा. Length 20 आणि Multiplier 2 ही प्रचलित सेटिंग आहे. चार्ट हिशोब आपोआप करून तिन्ही रेषा दाखवतो.

इंडिकेटर लावल्यानंतर चार्ट कसा दिसतो ते पाहा.

Keltner Channels

समजा, रोज कामावर जायला सरासरी ३० मिनिटं लागतात. वाहतुकीमुळे कधी २५ तर कधी ३५ मिनिटं लागतात. Keltner Channel भावासाठी असा पट्टा दाखवतो. मध्ये EMA असते आणि वर-खाली किती अंतर ठेवायचं ते ATRवर ठरतं.

चार्टवर कसं वाचायचं? EMA ₹१०० आणि ATR ₹३ असेल, तर दुप्पट अंतर घेतल्यावर रेषा ₹१०६ आणि ₹९४ ला येतात. ATR वाढला तर पट्टा रुंद होतो.

चार्टवर कसं लावायचं? ƒx / Indicators मध्ये Keltner Channels शोधा. EMA २० आणि ATRच्या दुप्पट अंतर हे एक उदाहरण आहे.

इंडिकेटर लावल्यानंतर चार्ट कसा दिसतो ते पाहा.

Donchian Channels

समजा, दुकानात गेल्या २० दिवसांत एका दिवशी सर्वात कमी ₹९० आणि एका दिवशी सर्वात जास्त ₹११० ची विक्री झाली. हे दोन आकडे रोजची विक्री कोणत्या पट्ट्यात होती ते दाखवतात. Donchian Channel चार्टवर अलीकडचे सर्वात जास्त आणि सर्वात कमी भाव दाखवतो.

चार्टवर कसं वाचायचं? मागच्या २० कॅण्डल्सचा पट्टा ₹९० ते ₹११० होता आणि आता भाव ₹११२ झाला, तर तो जुन्या पट्ट्याबाहेर गेला. ₹११० च्या खाली परतला तर तो पुन्हा जुन्या पट्ट्यात आला.

चार्टवर कसं लावायचं? ƒx / Indicators मध्ये Donchian Channels शोधा. २० निवडलं तर चार्ट २० कॅण्डल्सचा भावपट्टा दाखवतो.

इंडिकेटर लावल्यानंतर चार्ट कसा दिसतो ते पाहा.